Til hamingju Breiðablik, sigurinn gleður gamlan formann félagsins

Þá er sú stóra stund upp runnin að Breiðablik er Íslandsmeistari í knattspyrnu í úrvalsdeildinni. Vissulega gleður það gamlan formann félagsins og gullblika að bikarinn er í höfn. Ég held að ég verði að draga fram í dagsljósið gamla mynd sem ég held að ég eigi enn í fórum mínum. Hún er af fyrsta knattspyrnuliði Breiðabliks sem þá var ekki í neinni deild eða móti heldur var hóað saman mönnum í fullu fjöri í Kópavogi sem grunur lék á að gætu sparkað bolta, sumir hverjir meira að segja lifandi enn þann dag í dag.  Það var ákveðið að ráðast ekki á garðinn þar sem hann var hæstur og einhverjir töldu vænlegast að keppa við sveitamenn. Þess vegna varð bræðrafélag okkar í Mosfellssveit fyrir valinu, Ungmennafélagið Afturelding, þar var vinum að mæta, bæði félögin í Ungmennasambandi Kjalarnesþings. Ég fór með þennan vaska hóp sem formaður Breiðabliks á Varmárbakka, þetta varð hörkuleikur.

Hann endaði 9-0

En því miður, það var Afturelding sem vann.

Já, það er mikið vatn runnið til sjávar síðan þessi leikur fór fram, þetta gerðist líklega fyrir 55 árum.

Enn og aftur til hamingju Breiðablik.

Athugasemdir

[Guðmudur júlíusson (IP-tala skráð) 25.9.2010 kl. 21:33]

Hamingjuóskir Sigurður, þú hlýtur að vera stolltur þar sem þú átt mikinn þátt í uppbyggingu félagsins sem fyrrum formaður.

Átt þú stráka sem spilað hafa fyrir Breiðablk ?

[Sigurður Grétar Guðmundsson, 26.9.2010 kl. 11:10]

Guðmundur, þakka þér góðar óskir. Það var vissulega æsispennandi á síðustu mínútunum að hlusta á útvarpið frá Garðabæ í gær.

Ég á vissulega 4 stráka á aldrinum 35 - 48 ár. Allir hafa þeir spilað fótbolta, mismunandi mikið,  en það er merkilegt; allir hafa þeir spilað með HK! Nú er dóttursonur minn 19 ára, Hafsteinn Kolbrúnarson Briem, í meistaraflokki HK og sonarsonur minn, Eyþór Andri Sváfnisson 11 ára, hann spilar með sínum aldursflokki í HK.

En þegar slíkir stórviðburðir verða; að Breiðablik verður Íslandsmeistari í úrvalsdeild í knattspyrnu, þá getur ekki hjá því farið að ýmislegt sem er löngu grafið skjóti upp kollinum. Ég vil meina að ég sé nokkurskonar faðir Knattspyrnudeildar Breiðabliks, því mig minnir að það hafi verið í minni formannstíð, allavega samdi ég fyrst lög eða reglur fyrir deildirnar, að Breiðabliki var skipt í deildir sem voru a) Knattspyrnudeild, b) Handknattleiksdeild, c)Frjálsíþróttadeild, d) Málfunda- og briddsdeild. Sú síðastnefnda tók fljótlega skákina upp á sína arma. Á þessum árum  og þeim næstu voru það stúlkurnar sem báru uppi boltadeildirnar, Breiðablik átti fantagott lið í handbolta að ég nú ekki tali um fótboltann.

Nokkru seinna vann Breiðablik Frjálsíþróttamót Ungmennasambands Kjalarnesþings á stigum í fyrsta sinni og þar með Ólafsbikarinn, sem var mikill forlátagripur sem Ólafur Thors gaf í því augnamiði. Ekki man ég það gerla en það er ekki frá því að Breiðablik hafi unnið Ólafsbikarinn til eignar. Ég gat aldrei neitt í boltaíþróttum en lagði nokkur stig í púkkið til að vinna Ólafsbikarinn með því að vinna 3000 m hlaupið.

Svona stórviðburðir koma róti á gamlan huga eins og þú sérð.

[Sigurður Grétar Guðmundsson, 26.9.2010 kl. 23:47]

Stundum tekst slysalega til þegar skrifað er á bloggið. Það virðist texti hafa dottið út í minni fyrri athugasemd. Þar með datt enn einn HKingur út, dóttursonur minn Brynjar Orri Kolbrúnarson Briem sem er 13 ára og spilar fótbolta með sínum flokki hjá HK.