Fólk virðist tilbúið til að skrifa undir hvaða vitleysu sem er

Ólafur Ragnar forseti sagði í nýársávarpi sínu að þjóðaratkvæðagreiðslan sem hann bjó til um fyrri Icesave samning sýndi að þjóðinni væri treystandi til að taka ákvarðanir í stærri málum með þjóðaratkvæðagreiðslum. Ég var í upphafi, og lengst af, stuðningsmaður Ólafs Ragnars til forsetakjörs og til setu í því embætti. En satt að segja er ég að verða oftar og oftar ósammála Ólafi Ragnari og svo er einnig um þennan boðskap hans frá nýársdegi. Þjóðaratkvæðagreiðslan um Icesave var engin sönnun fyrir hve djúpvitur þjóðarsálin er, þær kosningar voru hálfgerður skrípaleikur. Sem frambjóðandi til Stjórnlagaþings lýsti ég mig fylgjandi þjóðaratkvæðagreiðslum en um slíkar kosninga yrði að gilda fastar reglur hvernig þær bæri að. Eitt er víst; það er með öllu ófært að einn  maður með athyglissýki geti ákveðið upp á sitt eindæmi að nú skuli þjóðin kjósa. Eitt slíkt slys er í uppsiglingu; þó Alþingi samþykki nýjasta Icesavesamninginn þá mun maðurinn á Bessastöðum kalla fram þjóðaratkvæðagreiðslu, hann hefur nánast lýst því yfir.

Tugir þúsunda einstaklinga virðast tilbúnir til að skrifa undir nánast hvað sem er ef einungis nógu öflugir áróðursmeistarar skipuleggja framtakið. Annarsvegar krafan um að auðlindir á og í landi séu þjóðareign og hinsvegar herleiðing Sunnlendinga til að mótæla afnotagjaldi bifreiðaeigenda af notkun þjóðvega, gjald sem rynni óskert til að endurbæta slysagildrurnar á þjóðvegum út frá höfuðborginni. Ég skal fúslega játa að ég var í upphafi harður andstæðingur þessa afnotagjalds en ég hef alla tíð verið ákaflega lélegur í múgmennsku. Ég skrifa aldrei undir neinar bænaskrár sem eru síðasta arfleifð kóngaveldis á Íslandi. En mér finnst það skylda hvers og eins þjóðfélagsþegns að kryfja hvert mál til mergjar, ekki að verða fórnarlamb múgmennsku eða hjarðmennsku, gera bara eins og allir aðrir gera. það er einmitt verið leiðin til lélegra stjórnarhátta, lýðræðið krefst þess að "hver maður geri skyldi sína" og skoða bakgrunn hvers máls. Þjóðaratkvæði um auðlindirnar er dæmi um frumhlaup sem er algjörlega án nokkurrar hugsunar, enginn veit hvernig á að forma þá spurningu sem ætlast er til að fari í þjóaratkvæði. Sunnlendingar þvinguðu fram á sínum tíma að Suðurlandsvegur á milli Reykjavíkur og Selfoss yrði 2+2 í stað 2+1 þó það þýddi fyrst og fremst óheyrilega sóun á fjármunum. Og nú hafa tugþúsundir Sunnlendinga mótmælt með múgmennsku og undirskriftum því að tekið sé afnotagjald af þeim sem um vegina út frá Reykjavík aka. Enginn vill borga meira fyrir gæði en hann er er nauðbeygður til. Hins vegar er það mín skoðun að við Sunnlendingar eigum aðeins um tvennt að velja:a) að greiða afnotagjaldið næstu árin, að hverfa frá 2+2 á Suðurlandsvegi og leggja 2+1 veg og fá endurbætur á einum hættulegasta þjóðvegi landsins, b) að berjast kröftuglega gegn afnotagjaldinu m. a. með alkunnri múgmennsku og undirskriftum og kveða það niður í eitt skipti fyrir öll og fá mjög takmarkaðar endurbætur á Suðurlandsvegi næsta áratuginn.

Sunnlendingar, þið eigið valið. Er til of mikils mælst að þið notið þær heilasellur sem hver og einn á og skoðið málið í kjölinn.

Athugasemdir

[jón ásgeir (IP-tala skráð) 17.1.2011 kl. 16:57]

Þú Sigurður sem meinar að ekki sé hægt að gagnrýna ástandið þar sem viðkomandi býr, sé það í Skandinavíu eða Sauðárkróki. ...Af því að hann hafi flúið þangað eða bara geti ekki betur.  Svona speki sem er andstæð gamla máltækinu að heimskur sé jafnan heimaalin ...

Hvað sparaði fólkið mikið með því að segja nei í síðustu þjóðaratkvæðagreiðslu um Icesavið þeirra Jóhönnu og Steingríms?

 Hvað ætli það hafi verið stór hluti af tekjum og lífsskilyrðum bara og barnabarna þinna sem hafi sparast?

Er það ekki augljóst hverjum hugsandi manni að Icesave er ekki skylda Íslendinga eða á ábyrgð íslensks almennings.  Alveg sama þó krötum þyki þetta eðlilegur fórnarkostnaður til að senda Ísland í ESB fangaklefann.  

  Það væri varla mikið um að semja ef svo væri.  Eða hvað?

[jón ásgeir (IP-tala skráð) 17.1.2011 kl. 17:01]

Og varðandi vegagjöld!

Ágætt eru mörg dæmi frá Noregi.  Lélegasta vegakerfi í Evrópu, en nóg innheimta þeir í vegatolla.

Hvert er nú samhengið þar spyr sá sem er alveg hjartanlega sammmála mörgum sunnlendinginu og suðurnesjamanninum.  Og hefur meira að segja staðfest á pappír að hann hafi notað nokkrar heilasellur og haft gagn af...  svona inn á milli í það minsta.

[Númi (IP-tala skráð) 17.1.2011 kl. 23:36]

Já þið talið um lélegt vegakerfi,en mig langar að spyrja Vatnsvirkjameistarann um lagnakerfi.Hvernig á hús að vera jarðtengt Sigurður,!er nóg að hafa kaldavatnsinntakið jarðtengt.?Það er svo þettað með skrifæðið hjá þjóðinni,nú við erum svoddan bókaþjóð erum óð í skrif og að skrifa.Þarna með spurninguna, Sigurður væri ágætt að fá álit. Þakkir.

[Sigurður Þorsteinsson, 17.1.2011 kl. 23:38]

Versta hjarðmennska sem til er, er að verja ákvarðanir einhvers stjórnmálaflokks, bara af því að misvitrir forystumenn hans hafa náð fram samþykki í flokknum fyrir einhverjum málum. Þetta kalla ég flokksauði. Það er erfitt að finna hér á blogginu gleggra dæmi um flokksauði eins og þig.

Þú hefðir viljað láta samþykkja Icesave í byrjun, sem allir nema þeir allra sauðskuðstu hefðu nú hafnað. Auðvitað hefðir þú ekki þurft að hafa áhyggjur af greiðslunum, heldur börnin og barnabörnin. Þegar að gjalddögunum hefði komið, værir þú lögnu dauður. 

[Guðmundur Ingi Kristinsson, 18.1.2011 kl. 01:36]

Merkilegt hvernig hægt er að gefa skít í þjóðaratkvæðagreiðslur nema eina: Alþingiskosningar. Ef fólk er of vitlaust nema þú væri ekki réttast að banna þær líka eða kannski væri fróðlegt að lesa sögu Swiss.

[Jón Logi (IP-tala skráð) 18.1.2011 kl. 07:34]

Það er nú klént að kalla kjósendur heimska og heilaþvegna þegar kosning er mjög afgerandi. Hvað þá þegar málefnið er mjög absolút að auki.

[Sigurður Grétar Guðmundsson, 18.1.2011 kl. 10:17]

Þú Sigurður sem meinar að ekki sé hægt að gagnrýna ástandið þar sem viðkomandi býr, sé það í Skandinavíu eða Sauðárkróki. ...Af því að hann hafi flúið þangað eða bara geti ekki betur.  Svona speki sem er andstæð gamla máltækinu að heimskur sé jafnan heimaalin ...

Jón Ásgeir, að ofan er dæmi úr því sem þú segir, þú verður að fyrirgefa en ég skil hvorki upp né niður í því hvað þú meinar með því sem þú segir þarna eða öðru í þínu máli, en það kann að vera skilningskorti mínu að kenna.

Það hníga öll rök að því að Icesave málið sé búið að kosta þjóðarbúið mikið, að ekki tókst að koma því út úr heiminum strax í upphafi, líklega verður það aldrei reiknað út. Vissulega er núverandi tilboð hagstæðara en það fyrra sem fór í þjóðaratkvæð, aðallega vegna hagstæðari vaxtakjara sem stafar af alþjóðlegri þróun. en töfin hefur kostað sitt. Það hafa verið gerð ýmis mistök í meðferð Icesavemálsins, þau mest að hafa ekki fengið útlenda þrautreynda samningamenn strax í upphafi.

Guðmundur Ingi, það er alltaf dapurlegt þegar ekki er hægt að  ræða mál af yfirvegun og málefnalega. Ég er hlynntur þjóðaratkvæðagreiðslum einsog ég segi að framan, en þá verður að um þær skýrar leikreglur og alls ekki að einn maður geti ákveðið að skjóta málum í þjóðaratkvæði út af eigin geðþótta.

Sigurður Þorsteinsson, ég hélt ekki að ég ætti eftir að reyna þig að svo mikilli lágkúru eins og þegar þú segir: Það er erfitt að finna hér á blogginu gleggra dæmi um flokksauði eins og þig.

Ég hef aldrei farið dult með það að ég er flokksbundinn Samfylkingarmaður. En ég hef ekki hikað við að gagnrýna mína flokksfélaga, þú getur lesið það á mínu bloggi að ég skoraði á Árna Pál að segja af sér og hér nálægt skora ég á Ögmund að endurskoða það sem ég nefndi óráðsíu forvera síns, flokksbróður míns Kristjáns Möllers og átti þá við ákvörðun hans að Suðurlandsvegur skyldi vera 2+2.     

En lengi skal manninn reyna, hatur þitt á Samfylkingunni hefur aldrei farið dult og þá skal ekki hika við að ausa yfir þá sem þeim flokki fylgja órökstuddum brigslyrðum.