Getur Hrannar verið áfram aðstoðarmaður Jóhönnu forsætisráðherra?

Það er gott framtak hjá Ágústi H. Bjarnasyni að birta mjög umtalaða grein Evu Joly um framkomu útlendinga, ráðandi manna í æðstu stöðum, gagnvart Íslandi, meira að segja á norsku, ensku, frönsku og íslensku. Ég er þegar búinn að senda greinina á norsku til tveggja í Noregi, einnig tveggja í Svíþjóð og svo sendi ég syni mínum í Frakklandi hana auðvitað á frönsku. Mér finnst grein Evu hnitmiðuð og rökföst og hún rifjar upp stutta grein eftir Ólaf Hauksson fjölmiðlatengil um að ekki hafi verið staðið nógu vel að kynningarmálum erlendis á okkar sérstæðu aðstæðum eftir hrunið og reyndar skortir enn á það að nógu vel sé að því staðið innanlands.

En hvað um Hrannar?

Hrannar er aðstoðarmaður Jóhönnu Sigurðardóttur forsætisráðherra. Jóhanna valdi hann sjálf til þeirra verka að vera hennar nánasti samverkamaður.  Þess vegna bregður manni illilega þegar persóna í slíkri stöðu veður fram og gagnrýnir hvað er sagt um íslensk málefni eins og Eva Joly gerði í grein sinni. Hrannar mun hafa sagt á heimasíðu sinni að Eva ætti ekki að skipta sér af efnahagsmálum Íslands, það væru aðrir sem færu með þau mál. Er hægt að líta á það öðruvísi en þannig að það sem aðstoðarmaður forsætisráðherra lætur frá sér fara sé bergmál af skoðunum ráðherrans? Í öðru lagi; eiga aðstoðarmenn ráðherra yfirleitt að vera að leggja orð í belg í opinberri umræðu, þeir eru í mjög viðkvæmri og sérstæðri stöðu.

Getur Hrannar verið áfram aðstoðarmaður forsætisráðherra?

Auðvitað verður Jóhanna að ákveða það. En hún verður að gera sér það ljóst að ef engin breyting verður á högum  og störfum Hrannars er hún að taka afstöðu með hans skoðunum sem hann hefur sett fram á ákaflega óheppilegan hátt.

Að mínu áliti á Jóhanna að víkja Hrannari úr starfi.

.

 

 

Athugasemdir

[hilmar jónsson, 3.8.2009 kl. 23:42]

Víkja honum úr starfi fyrir að hafa sjálfstæðar skoðanir ? Það gera bara Sjálfstæðismenn.

[sandkassi (IP-tala skráð) 3.8.2009 kl. 23:55]

Ég sé enga ástæðu til þess að túlka þetta sem neitt annað en skoðannir Jóhönnu og Samfylkingarinnar. Dæmin eru bara orðin of mörg og skemst er að minnast umræðu um Jojy sem tóku þátt í Ólína Þorvarðardóttir og Ólafur Arnarsson en sú umræða var til skammar.

Einungis þeir sem fara fyrir vafasömum hagsmunum ráðast með þessum hætti að Joly og bak við þetta stendur Jóhanna sjálf. 

[hilmar jónsson, 3.8.2009 kl. 23:57]

Samsæriskenning Gunnar. Leyfum Jóhönnu að tjá sig áður en við dæmum.

[sandkassi (IP-tala skráð) 4.8.2009 kl. 00:05]

Nei Hilmar þetta er engin samsæriskenning, bara raunsæi. þetta er heldur ekki spurning um að dæma, ég vil bara starfsfólk sem er treystandi. Ekki gleyma því að þetta fólk vinnur hjá okkur og þiggur hjá okkur laun.

[hilmar jónsson, 4.8.2009 kl. 00:10]

Geir Harde og Árni Matt og Framsóknarmafían þáðu líka laun af okkur. Var þeim treystandi ?

[sandkassi (IP-tala skráð) 4.8.2009 kl. 12:02]

einn dag í einu Hilmar, ´við erum staddir í júlí 2009.

[hilmar jónsson, 4.8.2009 kl. 15:43]

En lærum af bituri reynslu..(Það er komin ágúst hjá mér..)

[sandkassi (IP-tala skráð) 4.8.2009 kl. 23:00]

ah klikkaði-:)