Ban-Ki-moon hafður að háði og spotti á norðurslóðum

3.9.2009 | 09:58

Ban-Ki-moon hafður að háði og spotti á norðurslóðum

Ban-Ki-moon er maður nefndur kóreskur að þjóðerni. Hann gegnir þeirri stöðu að vera framkvæmdastjóri Sameinuðu þjóðanna. Það voru einmitt þau, að mörgu leyti mikilvægu samtök, sem ýttu úr vör fyrir meira en tveimur ártugum áróðrinum mikla um að meðalhiti jarðar fari hækkandi sem sé mikil ógn við lífríki okkar jarðarbúa. Sett var á stofn mikið apparat sem ber skammstöfunina IPCC og nú hafa þúsundir einstaklinga lifibrauð sitt af því að halda stíft fram með öllum ráðum að hiti fari hækkandi á hnettinum. Þeir vísindamenn sem andæfa og gleypa ekki kenninguna hráa eru úti í kuldanum á ráðstefnum IPCC í Kyotu, Bali, Posnan og eflaust verður það sama uppi á teningnum á væntanlegri ráðstefnu í Kaupmannahöfn eftir 3 mánuði.

En aftur að karlinum honum Ban-Ki-moon

Í fréttum í gærkvöldi er hann að sigla í ís einhversstaðar nálægt Svalbarða, umkringdur vísindamönnum sem eru að heilaþvo karlinn, sýna honum ís sem er að bráðna og sanna þar með kenninguna um hækkandi hitastig jarðar sem muni hafa skelfilegar afleiðingar.

Nú vill svo til að eðlisfræðin gerir það að verkum að ís eykst á norðurslóðum yfir kaldasta tímann, veturinn, en minnkar yfir þann heitari, sumarið.

Ef skrollað er á neðri blaðsíður á blogginu mínu koma fram upplýsingar um flatarmál Pólaríssins síðustu ár. þessar tölur eru frá japanskri vísindastofnun: Japan Aeorospace Exploration Agency. Þar koma meðal annars þessar tölur fram:

1. maí 2008 var Pólarísinn 13.160.938 ferkílómetrar

1. sept. 2008 var Pólarísinn 4.957.656 ferkílómetrar

Þarna má sjá hve gífurleg sumarbráðnunin er, sú sumarbráðnun hefur ætíð orðið hvarvetna á norðurslóðum, sú sumarbráðnun sem nú er notuð til að blekkja þann einfalda Ban-Ki-moon. Þess má geta vegna stöðugs áróðurs um að Pólarísinn sé að hverfa að ísinn hafði ekki verið jafn mikill að flatarmáli árum saman og 2008 en JAEA gerir mælingar á ísnum daglega með gervihnetti. Það er engin tilviljun að mælingarnar eru gerðar 1. maí og 1. sept ár hvert, þá kemur hámark og lágmark á flatarmálii íssins best í ljós. Flatarmál íssins segir ekki alla söguna um magnið, það þarf líka að mæla þykktina. Bandaríski herinn mælir þykktina með baujum sem reka með ísnum og árið 2008 reyndist hann sá þykkasti til margra ára.

Það var dapurlegt að heyra tilfinningaþrungna tölu Ban-Ki-moon í gærkvöldi í Sjónvarpinu, aumingja maðurinn trúði eflaust því sem honum var sýnt; að bráðnun íssins við Svalbarða væri einstakt fyrirbrigði sem sannaði allt sem kemur fram í vægast sagt vafasömum kenningum og skýrslum IPCC, loftslagsstofnunnar Sameinuðu þjóðanna.

En nú er ekki nema eðlilegt að einhver spyrji:

Hvernig getur einn pípulagningameistari í Þorlákshöfn efast um það sem þúsundir vísindamanna halda fram um hlýnun andrúmsloftsins og spá einnig stöðugri hlýnun alla þessa öld eða næstu 90 ár?

Því er til að svara að kenningarnar eru ákaflega ótrúverðugar.

CO2,koltvísýringur, er um það bil 1% að gróðurhúsahjálminum

Af þessu 1% hefur verið sýnt fram á að aðeins 0,117% sé af manna völdum.

Það hefur verið sannað að á liðnum árþúsundum er EKKI fylgni milli aukningar CO2 í andrúmslofti og hækkandi hita á jörðinni.

Á árunum 1929 - 1933 minnkaði CO2 af mannavöldum um 30%. Á sama tíma jókst bæði meðalhiti jarðar og CO2 í andrúmslofti.

Á árunum 1940 - 1977 féll meðalhiti jarðar um 0,3°C og vetrarkuldi varð mikill. Á sama tíma jókst CO2 geysilega mikið.

Síða árið 2002 hefur aukning á meðalhita jarðar stöðvast, sum árin fallið. Á sama tíma hefur maðurinn sleppt frá sér 150 milljörðar tonna af CO2 sem eftir kenningum IPCC ætti að hafa gífurleg áhrif til aukningar á meðalhita á jörðinni.

Og síðast en ekki síst: IPCC fékk nóbelsverðlaun fyrir starf sitt ásamt Al Gore. Þúsundir manna hafa lifibrauð sitt af því að vinna stöðugt að áróðri fyrir kenningum IPCC. Fjölmiðlar endurvarpa stöðugt þeirra áróðri, þeir sem efast eða vilja láta vísindin njóta sannmælis fá aldrei inni í fjölmiðlum. Ef þær þúsundir vísindamanna sem eru á snærum IPCC færu að halda öðru fram en hinni einu sönnu kenningu mundu þeir missa sitt lifibrauð.

Auðvitað er það mannlegt að halda utanum sína hagsmuni.

Þess vegna er Ban-Ki-moon heilaþveginn við Svalbarða.

Meginflokkur: Stjórnmál og samfélag | Aukaflokkar: Sjónvarp, Umhverfismál, Utanríkismál/alþjóðamál | Facebook

Athugasemdir

Þú segir:

Þeir vísindamenn sem andæfa og gleypa ekki kenninguna hráa eru úti í kuldanum á ráðstefnum IPCC í Kyotu, Bali, Posnan

Ég spyr: Hvaða vísindamenn?

Þú segir:

Þarna má sjá hve gífurleg sumarbráðnunin er, sú sumarbráðnun hefur ætíð orðið hvarvetna á norðurslóðum, sú sumarbráðnun sem nú er notuð til að blekkja þann einfalda Ban-Ki-moon.

Vissurðu það að sumarbráðnunin hefur aukist nokkuð síðastliðna áratugi (hlýnun jarðar), sjá útbreiðslu hafíss eftir sumarbráðnun frá árinu 1979 (bráðnunin nú í ár verður að öllum líkindum svipuð og árið 2008 ef lítil breyting verður á):

Þú segir ennfremur:

Flatarmál íssins segir ekki alla söguna um magnið, það þarf líka að mæla þykktina. Bandaríski herinn mælir þykktina með baujum sem reka með ísnum og árið 2008 reyndist hann sá þykkasti til margra ára.

Í fyrra hafði hann aldrei verið yngri né þynnri:

Þú spyrð:

Hvernig getur einn pípulagningameistari í Þorlákshöfn efast um það sem þúsundir vísindamanna halda fram um hlýnun andrúmsloftsins og spá einnig stöðugri hlýnun alla þessa öld eða næstu 90 ár?

Djöfull er þetta góð spurning hjá þér, maður spyr sig.

Þú fullyrðir:

CO2,koltvísýringur, er um það bil 1% að gróðurhúsahjálminum

Hvað meinarðu?

Af þessu 1% hefur verið sýnt fram á að aðeins 0,117% sé af manna völdum.

Nú er magnið yfir 380 PPM, fyrir iðnbyltingu var það um 280 PPM (rúnaðar tölur). 30% aukning af mannavöldum sirka (lauslegir útreikningar).

Það hefur verið sannað að á liðnum árþúsundum er EKKI fylgni milli aukningar CO2 í andrúmslofti og hækkandi hita á jörðinni.

Á liðnum árþúsundum hefur hiti jarðar fylgt nokkuð vel náttúrulegum sveiflum (t.d. virkni sólar og útblástur eldfjalla - auk möndulhalla og allra þeirra þátta) - Það á ekki lengur við og nú er CO2 í andrúmslofti helsti hvati hlýnunar jarðar.

Á árunum 1929 - 1933 minnkaði CO2 af mannavöldum um 30%. Á sama tíma jókst bæði meðalhiti jarðar og CO2 í andrúmslofti.

Jæja, hvernig færðu þetta út, sérstaklega hvar finnurðu upplýsingar um magn CO2 í andrúmsloftinu frá þessum árum og hversu nákvæm og lýsandi fyrir jarðarkúluna telurðu að þau séu?

Á árunum 1940 - 1977 féll meðalhiti jarðar um 0,3°C og vetrarkuldi varð mikill. Á sama tíma jókst CO2 geysilega mikið.

Á þeim árum jókst einnig útblástur á sóti og öðrum örðum sem höfðu áhrif til kólnunar.

Síða árið 2002 hefur aukning á meðalhita jarðar stöðvast, sum árin fallið. Á sama tíma hefur maðurinn sleppt frá sér 150 milljörðar tonna af CO2 sem eftir kenningum IPCC ætti að hafa gífurleg áhrif til aukningar á meðalhita á jörðinni.

Náttúrulegar sveiflur hafa eðlilega áhrif þegar talað er um jafn stutt tímabil og þú vilt nota hér. En þrátt fyrir allt þá eru öll árin eftir 2002 á topp 10 listanum yfir heitustu ár frá því mælingar hófust:

Svo segirðu:

Ef þær þúsundir vísindamanna sem eru á snærum IPCC færu að halda öðru fram en hinni einu sönnu kenningu mundu þeir missa sitt lifibrauð.

Ef einhver myndi finna aðra kenningu sem lýsir betur af hvaða völdum núverandi hlýnun er, þá fengi hann Nóbelinn og sess í vísindasögu jarðar.

Loftslag.is, 3.9.2009 kl. 15:46

Ég bara varð að tékka á því betur, hvaða upplýsingar eru til um þessa fullyrðingu þína:

Á árunum 1929 - 1933 minnkaði CO2 af mannavöldum um 30%. Á sama tíma jókst bæði meðalhiti jarðar og CO2 í andrúmslofti.

Ég fann þessa mynd:

Stendurðu enn við þessa fullyrðingu?

Loftslag.is, 3.9.2009 kl. 15:54

Þetta eru rangar tölur hjá þér (að mér vitandi).. ég var búinn að kíkja á þetta þegar ég bloggaði við einhverja global warming frétt fyrir nokkru. Við mína leit þá fann ég út að :

CO² er innan við 5% af öllum gróðurhúsalofttegundum, eða um það bil 3.5-4%. 95% af öllum gróðurhúsalofttegundum er Vatnsgufa (Ský ef þú vissir það ekki), Metangas og Niturgas er ca 1% og aðrar lofttegundir fylla restina.
Hvað er mikið hlutfall af CO² í loftinu af mannavöldum?... undir 10%.

Ég failaði hinsvegar á því að linka í hvaðan ég fékk þessar tölur og er búinn að gleyma því núna.

Jóhannes H. Laxdal, 3.9.2009 kl. 20:16

Það er ekki hægt að bera saman ísinn í maí 2008 og september 2008, þar sem þá ertu að tala um breytingu sem er vegna árstíðarbundinar sveiflu. Það vita þeir sem það vilja og það er alveg öruggt að enginn hefur notað þessar tölur til að blekkja Ban-Ki-Moon, enda er maðurinn væntanlega ekki svo mikill einfeldingur að skilja ekki muninn á árstíðabreytingu og svo breytingu til lengri tíma.

Það sem er gert til að bera saman þróun ísþekjunar er t.d. að skoða ísþekjuna í september ár hvert og þá kemur út þróun sem segir aðra sögu. 1979 var ísþekjan þegar hún var í lágmarki í september yfir 6 milljón ferkílómetrar en lágmarks ísþekjan bæði árið 2007 og 2008 var undir 4 milljónum ferkílómetrum. Þarna er verið að skoða þróun ísþekjunar til lengri tíma og án þess að líta til árstíðasveiflunar. Á þessu geta skólakrakkar áttað sig á...

PS. Ég sakna þess að þú getir heimilda um þær fullyrðingar sem þú setur fram um þessi mál.

Hérundir er ágætis myndband þessu tengt:

Sveinn Atli Gunnarsson, 3.9.2009 kl. 23:36

Það mistókst að setja inn myndbandið, en hér er tengill á það:

http://www.youtube.com/watch?v=PjAXoETeVIc&eurl=http%3A%2F%2Fwww.youtube.com%2Fuser%2Fsvatli&feature=player_profilepage

Sveinn Atli Gunnarsson, 3.9.2009 kl. 23:38

Allt er þá þrennt er:

http://www.youtube.com/watch?v=PjAXoETeVIc

Sveinn Atli Gunnarsson, 3.9.2009 kl. 23:42

"Bandaríski herinn mælir þykktina með baujum sem reka með ísnum og árið 2008 reyndist hann sá þykkasti til margra ára."

Það vanta heimildir takk fyrir. Samkvæmt gervihnattamælingum NASA er ísinn á undanhaldi og er að þynnast. Þú verður að koma með heimildir fyrir svona fullyrðingum...annars verður þetta bara markleysa hjá þér.

Sveinn Atli Gunnarsson, 5.9.2009 kl. 23:34

Mér finnst það miður að þú snúir út úr því sem ég segi til að fá rök fyrir þínu máli. Ég hef aldrei borið saman tölur um ísinn í maí annarsvegar og september hinsvegar, þetta eru einmitt þær tölur sem sýna eðlisfræðina eins og hún hefur birst okkur frá lokum ísaldar hvað gerist á norðurslóðum, Ég ber saman annarsvegar tölur frá maí til maí og hinsvegar tölur frá sept. til sept.

Annað finnst mér athyglisvert í þínum málflutningi. Þú krefst þess af mér að ég komi með heimildir fyrir hverju orði og skoðun sem frá mér kemur. En þú hinsvegar fullyrðir þetta og hitt og einblínir á allt sem frá IPCC og það finnst þér vera nægar heimildir. IPCC rekur enga sjálfstæða vísindarannsóknir heldur tínir upp alt sem fellur að stefnuskránni sem þeim var gefin í upphafi sem er:

Að sanna að maðurinn sé hækka hita á jörðunni.

Þessi stofnun, IPCC, á alls ekki að finna það sem sannara reynist heldur að sanna ákveðna kenningu.

Því miður ert þú í þeirri hirð, það er ekki sannleikurinn sem að takmarkið heldur trúin.

Sigurður Grétar Guðmundsson, 6.9.2009 kl. 00:02

Ég vitna reyndar í NASA í minni síðustu athugasemd en ekki IPCC og ég get ekki tekið undir með þér að ég vitni bara í IPCC. NASA stundar allskyns rannsóknir og mælingar, m.a. með gervihnöttum og er tiltölulega virt stofnun á sviði rannsókna og vísinda. Þú virðist helst ekki vilja geta þinna heimilda, spurningin er þá hvort þær eru til...?

Sveinn Atli Gunnarsson, 8.9.2009 kl. 17:32