Er vonlaust að berjast við málfarsþrjóta, þeir taka ekki mark á neinni gagnrýni?

Örfá atriði í þetta skipti.

Það eru allir að berjast fyrir "að fjölga atvinnutækifærum". Í mínu ungdæmi gerðu menn sitt besta til "að auka atvinnu". Þetta sýnir í hnotskurn hvernig hugtök eru sett fram á nýjan hátt með  fjölgun  atkvæða. Í fyrra tilfellinu eru  atkvæðin 10 en í því seinna 6. Þetta sýnir okkar málþróun. Þar fyrir utan er áferð setninganna þeirri fyrri í óhag finnst mér, en eru það kannski elliglöp?

Enn bendi ég þeim sem skrifa texta á, hvort sem það er á blogginu eða í öðrum fjölmiðlum, hve orðið "staðsett" er ofnotað og það spillir næstum alltaf textanum. Reynið næst að lesa yfir textann ykkar og athugið hvort orðið "staðsettur" kemur þar fyrir. Fellið "staðsettur" brott. Ég er ekki í nokkrum vafa að allir munu sjá að það er nær alltaf til bóta. 

Ekki má gleyma garminum honum Katli. Íþróttafréttamenn segja gjarnan að "báðir" hafi skorað fimm mörk. Eftir mínum skilningi þá hefur hvor leikmaður skorað tvö og hálft mark, ekki satt.? Eða eiga bögubósarnir við að "hvor"leikmaður hafi skorað 5 mörk?

Athugasemdir

[Júlíus Valsson, 22.5.2010 kl. 01:59]

Sæll Sigurður

Þetta sem þú lýsir er hreint klám sbr. "læri, læri tækifæri".

[Sigurður Þorsteinsson, 22.5.2010 kl. 10:13]

Sæll nafni

Nú er meira að segja Gylfi Arnbjörnsson farinn að gagnrýna ríkisstjórnina fyrir aðgerðarleysið varðandi atvinnumálin. Sennilega getur aðgerðarleysi Jóhönnu flokkast undir elliglöp, hvort sem við tölum um að auka atvinnu eða fjölga atvinnutækifærum.