"Ertu búinn að versla þér sundskýlu"

Nákvæmlega þetta, sem í fyrirsögn stendur, sagði Ragnhildur Steinunn í Kastljósi í gærkvöldi. Hvað er að ykkur sem starfið í fjölmiðlum, er til of mikils mælst að þið talið íslensku nokkurn veginn lýtalaust? Ef ungu mennina, sem rætt var við, vantar sundskýlu þá ráðlegg ég þeim að fara í einhverja verslun og "kaupa" sér sundskýlu. Fólk fer oft út að versla og kaupir sér hitt og þetta. Þetta viðtal var sannarlega fróðlegt, þessir tveir ungu menn eru að fara til Feneyja og ætla að leika þar tvo klæðlausa keisara í hálft ár á kostnað lands og þjóðar. Ég lái þeim ekki, klæðlausir keisarar hafa alltaf verið vinsælir og afburða seigir við að útvega sér peninga fyrir fötum sem enginn sér.

 

Athugasemdir

[Eygló, 21.5.2009 kl. 15:34]

Oj, sá/heyrði þetta líka. Reyndar fer þessi fallega kona ekki "mjög vel" :( með íslenskuna. 

Það étur hver upp eftir öðrum svo máltilfinningin dofnar hjá þeim sem á heyra. Hjá mörgum virðist hún gjörsamlega í dauðadái.

Kannski vilja þeir ekki 'versla' sér skýlu fyrr en 'verðin' verða betri!! En þeir eru að fara 'erlendis'.